Haba Peutuah

Bismillah mula fhoen-fhoen

Bacut pantoen lon ci rika

Nasehat bak ureung jameun

Masa keurajeun raja-raja

Peutuah Nek Tu troek bak cuco

Meu talo-talo saban masa

Yang le teuboh ureung meugah

Sebab fitnah ureung hina

Lom hai aneuk beu ta ingat

Barang nikmat bek ta lupa

Kebaikan gob berangkaso

Bek ta tuwo ingat beuna

Lapan peukara beu ta ingat

Yang fhoen nikmat bek ta lupa

Yang keu dua bek rijang deuge

Siat-at le ka mureuka

Keu lhee bek boh umu lanjut

Bak ta pubut daroehaka

Keu peut musoeh bek peumudah

Rayek susah saboh masa

Keu limoeng bek meu tipee

Ureung lapee beu ta publa

Yang keu nam bek peuturoet hate

Hai boh hate ingat beuna

Keu tujoeh bek pu but zalem

Hana so tem meu setia

Keu lapan pubut ban ta peugah

Bek beurakah yang na raya

Nyan keuh lapan hai rakan dro

Beurang kaso bek ta lupa

Haba peutuah ureung awai

Meu bek sagai tanyo lupa

Yang lapan teuk teumoen buno

Oleh tanyo ingat beuna

Fhoen oeh hase kebajikan

Syukoer tuhan tip-tip masa

Dua setia gata bak tutoe

Binasa yang le sebab haba

Keu lhee ureung yang meu akai

Bek na sagai gata hina

Meunyoe meurumpok brangkapat

Tabi adat peu mulia

Keu peut bek to deungoen musoeh

Nyan rakan beh beu tajaga

Limoeng rakan but beu hase

Deungoen pike ta keurija

Keu nam jaro teuh beu murah

Hamba Allah bek putoeh asa

Keu tujoeh pubut ban yang hukoem

Ban yang mufoem bak ulama

Ureung jeuheut bek meu rakan

Nyan keuh lapan hai syedara

Beu ta ingat wahe kawoem

Haba pantoen ureung tuha

Mungken gata kadang-kadang

Mat jabatan sidro raja

Peutuah nyoe bek ta tuwo

Beurangkaso ingat beuna

Ehno mantong wahe teungku
Wassalamu akhe kata.