Musem Keunoeng Sa

Alhamdulillah rahmat Tuhan bri
Kheundak ilahi ujeun ka teuka
Buleun dua blah katroeh keulai
Seu-um keu leupi jinoe meutuka

Ureung jak u blang untoeng han sakri

Kajeut meu tani pade geu pula
Pulom di gampoeng tan irigasi
Sabe hana ie susah lagoina

Yang jak u kantoe na dispensasi

Teulat sitali tamoeng keurija
Kadang watee troeh na ureung sudi
Jawaban geu bri ujeun that teuga

Dampak yang laen na cit terjadi

Jalan teudong ie leucek lagoina
Oeh ta grak langkah meu keumat gaki
Kuto luweu lie sampe troeh bak fa

Pulom bak jalan kulam meuriti

Hiasan seni jalan lam desa
Peu siblah uneun peu siblah u wi
Yang silop lili teutap meunoda

Bak ladoem teumpat laen terjadi

Tanoh teudong ie banjer troeh teuka
Buleun akhe thoen sabe lam leupi
Meunan kondisi cit ka biasa

Ka musem ujeun nama tanyoe bri

Masa teudong ie dalam blang raya
Le ureung tuha peunutoeh geu bri
Nama geurasi musem keunoeng sa

Ehnoe mumada ca-e lon puti
Bak blog Junaidi ulon peudoda
Kadang na salah meu'ah hai akhi
Haba lon reli keu gura-gura.