Subhanallah leumpah weuh hate
Doenya ka akhe laen that bentuk
Inoeng ngoen agam garang bukon le
Meu’en film pre rab bineh abeuk
Takheun yang muda teuga that batre
Yang tuha sampe galak cit bak lhuk
Uro ngoen malam jumoet meurabe
Mita barang pre keuna pu gusuk
Habeh rot darat takat rot hape
Adegan jahe ta deungoe ak-uk
Di sinyak dara glah sa SMP
Kueh meusile ladoem ka guruk
Poh dua malam agam dipangge
Mantong bee gambe awai gatai bruk
Nyoe keuh seujarah kisah ka lahe
Kisah nyata pre lon tuan sipreuk
Bukon keuh dongeng troeh rot angen gle
Kon haba jahe ulon tuan pruk
Jeut taci pantau rata sago gle
Ureung mat hape pakiban bentuk
Watee ta pandang memang weuh hate
Yang pah ngoen awe bak rung ta gusuk
Jameun modern keren tip sabe
Dusoen deungoen glee peunyaket jiduk
Peunyaket doenya nyata ka lahe
Ureung that jahe bak peugot gabuk
Hana ta sangka doenya rab akhe
Hana tapike watee lam uruk
Peunyaket kaya raya su sabe
Peunyaket dige ureung diteupuk
Peunyaket gasin meukuwin sabe
Peng tan keu gambe beu-o cit bak seuk
Peunyaket cinta kecewa tan pre
Oeh putoeh rante geusipak bruk-bruk
Peunyaket slingkuh juruh meucungke
Dua boh peurte keuluar masuk
Bukon le sayang karang boh pade
Dipoet angen gle reubah lam abeuk
Ohno mumada haba lon cae
Kadang na singke peumeu’ah hai buk
Thank you and good bye wassalam Pak De
Ulon meucae cukoep that gabuk
Tertanda jaro yang paso cae
Ureung yang singke bak sira duk-duk.