Jak Ta Bangun Nanggro

Aceh meutuah meugah ngoen makmu

Barat ngoen timu ramee that hase

Laoet ngoen darat cukoep meuceuhu

Tanoh that subu sampe dalam gle

Karoenya Allah keuneubah endatu

Nanggro geupageu hukoem yang ade

Rakyat geupapah bek sampe karu

Geuyu meusatu beu saboh hate

Beu saban kheun beu saboh ngoen su

Meunyoe meujampu tanyoe jeut cre-bre

Digob that galak tanyoe beu karu

Supaya taku jeut diboeh rante

Hukoem ngoen adat jeut jih mat iku

Jeut dipeulaku ban galak hate

Sabe keu dro-dro tanyoe diadu

Teungku ngoen Teuku ka dipeupake

Hukoem dibaloet dipaso gincu

'Oeh watee ta-eu ka meutuka ke

Beu ingat-ingat tanyoe e teungku

Bek dipeulangu lam eumpung bace

Meu kru seumangat rahmat Tuhanku

Bak watee ukeu taci seumike

Beuna taturi asli ngoen palsu

Beuna tateupu majun ngoen gambe

Bek dudo teulah salah peulaku

Ateuh siluweu taroe ie batre

Atra gob tacok atra dro ta siseu

Atra endatu hana ta tung le

Dum aso nanggro jino gob bahu

Tanyoe cit ta-eu gob yang cok hase

Keunoeng ngoen tipee sabe tip waktu

Sabe ditipu bandum sago gle

Jino na ruweung nanggro peumaju

Tanyoe meusatu e nyak boh hate

Ta pileh waki yang ditem bantu

Yang na diteupu hak-hak seumike

Bek roeh meupileh yang meu boh labu

Narit sigeutu han dijeut sampe

Yang na cit teungeut 'oeh troek bak bangku

Prut luhu laju ngoen peng-peng jahe

Lam seni pantoen haba lon bahu

Ranup sigapu lon boeh lam batre

Lon keuneuk bi peng cit hana mampu

Lon neuk bi breuh bu golom na hase

Nanggro Aceh nyoe tanyoe ci bantu

Rot tapileh su taci peulahe

Geutanyoe rakyat na hak meubantu

Cuma hat bi su tachoep peureute

Wahe bangsa lon barat ngoen timu

Beudoh meusatu bek le lalo le

Tacok iktibar masa yang lalu

Nanggro lam karu ureung dum mate

Kadang sabe dro payah koh taku

Allah Tuhanku han ek tapike

Ramee dum aneuk hana ma ngoen ku

Tan mupat kubu seudeh bukon le

Jino ta beudoh taci meusatu

Bantu meubantu taci cok hase

Miseu tamselan ureung yang meu’ue

Jino keuh miseu karap koh pade

Bak masa putik mirik peukaru

Ngoen hate luhu geujaga sabe

Adak bak tuboeh reu-oeh meu yu-yu

Adak abeh su geurela hate

Adak sigogo dho-dho meu pusu

Hana geukaru demi keu pade

Geu jaga tuloe geu jaga keubeu

Geu jaga dumpu yang ganggu pade

'Oeh keuneuk jeut koh sipade breuh bu

Di apa itu ka laen lahe

Ka geutik-tik boh pade yang luhu

Han le geu saweu u blang ka geu cre

Watee ta pike gura that lagu

Panee keuh hantu peu awo pi-e

Yang hana mungken geujak peulaku

Geuboh ie susu geujeb ie batre

Meunyoe ureung nyan ka meunan nafsu

Urat bak taku mungken hana le

Ka mate akai tan teupu sapu

Saraf meuganggu han abeh pike

Hai ureung Aceh bijeh meuceuhu

Yang meunan laku bek ta pakek le

Yang meunan contoh taboh lam pageu

Akai sibadu utak meugambe

Ado ngoen adun bandum meusatu

Aneuk deungoen ku bek le meupake

Kaya ngoen gasin bek meu kreuh-kreuh su

Saban ta maju peu saboh hate

Ulama Umara pih ka saboh su

Aceh meuceuhu bek na karu le

Rakyat peujabat pakat that dikeu

Aceh geutuju nanggro yang ade

Bangsa beu jaya rakyat beu makmu

Bek na le ta-eu ureung meukude

Bek na korupsi bekna ceumeucu

Rakyat ta bantu ngoen puteh hate

Alhamdulillah Allah Tuhanku

Neubi beu makmu nanggro nyoe sabe

Rakyat nyoe beu jroh beuna saboh su

Bek na le karu pake meu pake

Amin ya Allah amin Allahu

Amin Tuhanku ya Rabbul ade

Neubi bangsa lon beujroh dum laku

Barat ngoen timu mandum sago gle

Neu peu tren rahmat nikmat meusatu

Nanggro beu makmu hukoem beu ade

'Oehno mumada haba lon bahu

Meu’ah e teungku yang han meusampe

Kadang na bareh meucureh laku

Meu’ah e teungku baten ngoen lahe
Meunyoe na watee ta samboeng ukeu
Izin e teungku lon tutoep cae.