Jaro dua blah ateuh
jeumala
Keu bumoe Aceh
bacut lon kisah
Tanoh meutuah wareh
Aulia
Nanggro jih ubit
neubi le Allah
Hase meulimpah
pusaka kaya
Umat lam taat pujo
keu Allah
Rahmat meutamah
nanggro seujahtra
Laoet ngoen darat
meuhat dum macam
Uteun ngoen kulam
kalheuh geu tata
Ureung jak meu gle
ureung jak u blang
Meukat di peukan
geu meu niaga
Ureung meulaoet pih
na aturan
Jeut deungoen
pantang mandum teujaga
Hase lam tanoh
punoh beureukah
Minyeuk deungoen gah
batee meukaca
Meuh deungoen Timah
tamah lom Pirak
Tanoh itam krak keu
Batubara
Kupi ngoen Lawang
karang dum meusak
Karet meu bak-bak
meunan cit Lada
Hase lam keuboen
Jagoeng ngoen Pisang
Cukoep le macam dum
palawija
Ureung meu neuhen
udeung geu tambang
Kincir geu pasang
meu macam cara
Na eungkoet Sakap
na eungkoet Bawai
Na cit meu jan-jan
geu peulheuh Nila
Mandum atra nyoe
nikmat keu insan
Syukoer keu Tuhan
yang bek ta lupa
Kru seumangat
rahmat Tuhanku
Aceh beu makmue
neubi bahgia
Beu roeh lam taat
umat beusatu
Beu sabe makmue siumu masa.