Alhamdulillah kalimah thaibah
Pujo keu Allah rabbul izzati
Seulaweut saleum keu Rasulullah
Rasul yang meugah panghulee Nabi
Haba pemilu lon keuneuk peugah
Pantoen lon papah keu mangat hati
Dua ribee sikureung cobloh ka jeulah
Bek salah-salah ayah ngoen ummi
Peut ploeh peut partai nyang ka geu peusah
Meunan dipeugah haba bak tivi
Teuma di Aceh laen lom kisah
Nam boh geutamah oleh komisi
Partai lokal nama geu olah
Dum nan yang ka sah beuna taturi
Bek salah pileh oeh dudo teulah
Pike beu bagah nak rijang meuri
Golongan puteh jino lon peugah
Bek roeh ta papah hai ayah ummi
Meunyoe bit galak golput ta peu sah
Ta takoet kalah partai islami
Ta pileh partai misi yang jeulah
Miseu yang ka pah partai islami
Bek roeh ta pileh yang raya babah
Jai that meu ulah carong korupsi
Sigo tanyoe choep limoeng thoen teulah
Pike beu pah-pah bek sampe rugi
Bek sampe singoeh tanyoe troeh teulah
Babah ka teuhah keunoeng peulani
Miseu dirayu janji dijak hah
Sorry han keumah neu kheun hai abi
Meunyoe dibi peng langsoeng neu ramah
Soai peu beukah nyan laen versi
Bukoen le sayang pucoek bak lawah
Cabeung jih patah tan so peudoeli
Ehno mumada haba lon peugah
Bak laen sa’ah ta samboeng lagi.