Tanda Islam

Alhamdulillah pujo keu Rabbi
Yang peujeut hari siang ngoen malam
Seulaweut saleum puwo keu Nabi
Rasul Ilahi panghulee alam

Tanda Islam neukheun le Nabi

Meuteumee dali na peut boh macam
Tanda yang keu foen meurendah diri
Tuha ngoen mudi seusama Islam

Gasin ngoen kaya hina ngoen keuji

Meurendah diri bek na meu dendam
Hana yang leubeh nibak Ilahi
Terkeucuali yang tem sembahyang

Tanda keu dua beuna ta turi

Lidah beu suci nibak meu kalam
Bek na meu dusta sama sekali
Upat ngoen caci bek na meu peundam

Tanda yang keu lhee wahe e akhi

Pruet teuh beu suci nibak yang haram
Bek roeh ta pajoeh barang yang keuji
Mita raseuki bek asai hantam

Meu bek ta galak buntut ngoen judi

Figoer beureundi bek roeh meu idam
Minuman maboek bek ta dekati
Syetan peu dodi yang macam-macam

Tanging inoeng dro han le ta turi

Meulinte tari takheun mak sigam
Yang tuha bungkoek geujak lhee gaki
Bak mata seksi sang-sang meu keutam

Nibak watee nyan utak ka u wi

Hana le meuri haleu ngoen haram
Wahe kawoem lon muda ngoen mudi
Figoer beureundi beu ek ta reudam

Bek ta peusa dro ngoen si yahudi

Nyan cit ka dali kon ureung Islam
Rayek that dosa nibak Ilahi
Peut ploeh peut hari amai neu bungkam

Amai yang kana dalam rohani

Ngoen kheundak Rabbi laju teurancam
Tanda yang keu peut beuna ta turi
Tuboeh beu suci bek na meu dendam

Ujoeb teumeu’a teukaboe dengki
Ban peut boh dali habeh lon rantam
Ohno mumada haba lon rawi
Meu’ah hai akhi meunyoe na masam.