Islam Ka Pudar

Deungoen horeumat kawoem ban sigom
Saleum lon ci lhom keu rakan dumna
Lon cuba kisah haba ka meudom
Yang ka meu peu-om di Aceh raya

Seuramoe Mekkah ceudah tan balom

Nama geu tanoem le ureung tuha
Daerah modal yang taloe hantom
Adak pih di bom uleh Belanda

Agama Islam kong that geu tanoem

Han ek dipeunoem le kafe luwa
Adak pih peng griek ditik meu droem-droem
Nyan-nyan geu seumpom dalam moen tuha

Tetapi jinoe Aceh that balom

Islam ka teusom meunuroet kada
Agam ngoen inoeng meu’en meu som-som
Gadoeh keumarom lam seupoet buta

Islam ka pudar bak hi rab meugom

Syari’at diseumpom tan le dinit na
Watee ta pike seudeh hai kawoem
Le yang tan mufoem bideung agama

Sayang that sayang si bungoeng rungkoem

Kumbang jak coem-coem kiban yang hawa
Marwah hana le martabat teugom
Bandum nyan ka kom hana le guna

Si bungoeng Aceh dicukeh hantom

Meunan cit pulom kumbang jak ba-ba
Jameun ka pungoe jino laen lom
Kabeh teu gom-gom di likoet Honda

Siluweu keutat bajee pas pih lom

Meujungkat boh mom alahai poma
Oeh diduk Honda peurincun teu lhom
Yang mangat ta rhom deungoen geulawa

Takheun yang muda yang tuha pih lom

Le that yang gom-gom di rumoeh janda
Agam kheun kasep inoeng kheun toh lom
Yang mangat ta trom ta tampa-tampa

Yang saboh lagee modee laen lom

Bak lapak geu dom nafkah geu mita
Hana geu teupu hareum ka geu gom
Teuma geu seumpom dalam nuraka

Yang hobby maboek ie joek geu kabom

Badan meu seumpom ka singet donya
Yang maboek gelek sabe bak meusom
Seuring that-that tom bakoeng geu puta

Ohno mumada haba lon seumpom

Kadang keunoeng rhom meu’ah lon pinta
Meunyoe na umu Allah neubi lom
Bak laen kolom meurumpok teuma.