Peukateun Doenya

Alhamdulillah Allahu Ahad
Yang maha kuat lagi kuasa
Keu rakyat Aceh bacut lon surat
Leumpah that cakap lawet jino ka

Raseuki mudah bagah geu karat

Rata sago hat meulomba-lomba
Ureung meugo blang ureung meuneukat
Meu karat-karat bak mita laba

Yang jak u laoet yang tarek pukat

Geu langue bakat mita beulanja
Malam ngoen uro jaloe jak tambat
Cukoep meukarat bak geu useuha

Beu ek geu peugot rumoh meu tingkat

Nak manyang pangkat di keu manusia
Beu ek joek aneuk sikula hebat
Rayek deurajat ngoen ureung lingka

Meunan cit bago ureung meuneukat

Laba geu sulap meu macam cara
Yang peunteng untoeng bah pih syubeuhat
Yang leubeh gawat sulap neraca

Haleu ngoen hareum geu peunyum han that

Teutap geu karat hana geu tunda
Rakyat lam gampong pih saban silap
Cukoep meukarat bak let hareuta

Yang atoe nanggro pih bako that-that

Peurte peujabat lagee srigala
Carong ngoen licek bak balek ayat
Hukoem dimumat yang han ceulaka

Meu macam bago dituho balap

Hukoem disulap bek loep penjara
Hukoem lam nanggro cit jih yang peu cap
Panee keuh meuhat yang jeut bahaya

Adak teukeudi na yang peu teupat

Disurung suap putoeh peukara
Meunan keu modee ulee ka cacat
Ka jiduk ulat ka salah kira

Disangka harta yang dipeusapat

Akhirat meuhat han so pareksa
Ngoen hukoem doenya leupah ta balap
Hukoem hazarat hana pu coba

Tapi yang tanging jinoe jai that-that

Hukoem akhirat disangka gura
Ureung lam nanggro tuwo hakikat
Raja ngoen rakyat ka sadum kada

Meunyoe roeh tabi bacut nasehat

Dijaweub leugat bek kah jak kira
Sang-sang cit gata han ek keu that-that
Jak leh berangkat kajak seut paya

Tanyoe yang peugah han tajeut karat

Salah ta ucap ka meu peukara
Umpama jampoek jak bi nasehat
Bak salah ucap kajeut binasa

Tanyoe yang peugah pih kon pah that-that

Salah ngoen silap pasti na saja
Cuma cit geuyu di dalam kitab
Saleng nasehat tanyoe manusia

Ingat peu ingat bek jeut keu sisat

Keu jalan taubat bek sampe buta
Bukon le sayang karang boh langsat
Ka keunoeng kilat duroeh meu keuba

Keubit that sayang geutanyoe rakyat

Teungoeh meukarat ka keunoeng daya
Raseuki ta let rata jeut teumpat
Ta cok peusapat puwo u tangga

Raseuki mudah hana beureukat

Blo bacut sapat habeh belanja
Yang ladoem-ladoem peutheun droe meuhat
Makanan lezat hana geu kira

Geu peusaho peng keurija brat-brat

Timu ngoen urat bak geu useuha
Hajat geu neuk blo honda meu kilat
Karna tip saat na yang peutaba

Diiming-iming neucok hai sahbat

Hana meukarat soai beulanja
Ngoen peng si juta Kreta cok nyopat
Neu teken surat hai tgk apa

Dua Ploeh juta keureeta meuhat

Cahya meu kilat ka neutemee ba
Cuma si juta jinoe peurlee that
Laen jeut teulat dudo belanja

Bayeu kredit kheun awak barat

Aliran got that jinoe ka teuka
Yang cukoep peudeh nyan keuh di rakyat
Peng ta peusapat jak blo ceulaka

Rakyat yang bangai leupah disulap

Hudep diikat le awak lua
Watee han ek toep baroe meukarat
Pangkai ditambat deungoen keureeta

Rakyat han salah cit hana meuhat

Tapi yang gawat yang mat kuasa
Aceh cit nanggro hukoem hazarat
Hukoem syari’at teungoeh ta puga

Wahe pemimpin yang na meu daulat

Bak droneuh meuhat yang mat neraca
Neu jaga nanggro ka deungoen rakyat
Bek di peu alat le ureung lua

Hukoem syari’at jaga beu got that

Yang jeut keu cacat bek ta peulaga
Meunan harapan bak kamoe rakyat
Neu jaga siat bek dipeudaya

Kamoe nyoe ureung boh u tupee kap

Sapu han cakap bak ta peu cara
Hanya bak droneuh yang mat-mat kitab
Nanggro meu daulat beu neutem jaga

Neu jaga nanggro laoet ngoen darat

Doenya akhirat beu ek seujahtra
Bahgia doenya bahgia akhirat
Neu jaga rakyat bek roeh binasa

Meu hana meunan keu bit cukoep brat

Pemimpin rakyat resiko raya
Peu tanggoeng jaweub di keu hazarat
Geuyu peu teupat blang padang mahsya

Hana pu ragu hukoem hazarat

Balasan cit hat han pu chok sangka
Alhamdulillah ka habeh surat
Haba riwayat ohno mumada

Pat na yang salah meu'ah raya that
Kadang na silap di kamoe hamba
Kadang na tutoe teulanjoe that-that
Jaro lon angkat meu'ah beuraya.