Susah That

Aneuk keubiri di coeng bak langsat
Ditren peusawat di dalam paya
Uro raya nyoe karap beh lewat
Bajee tan mupat ngoen tablo hana

Bajee yang awai mandum ka sarat

Ka meu-ek lalat ban saboh lingka
Ta eu siluweu pih ka beukah brat
Ka beukah pantat ubebe raya

Keu-ing pih han troek sabab ka sarat

Aso meu lipat ka tumboen raya
Ta eu sipatu pih ka broek that-that
Hana le kilat oeh ta eu cahya

Siblah yang uneun ka tikoeh karat

Blah wi meu kulat ban saboh lingka
Ta neuk blo laen di peng tan meupat
Oen reutoeh bulat tinggai hareuta

Ta neuk meu utang malee teuh that-that

Le ureung meukat han dipeucaya
Watee ta pike susah teuh that-that
Kakeuh hai sahbat ta saba-saba

Memang ka meunan kheundak hadzarat

Mungken hai sahbat tanyoe geu coba
Adak lagee nyan meunyum meu karat
Doa ta panjat pujo rabbana

Umpama saleum ucapan slamat

Jaro ta mumat bak uro raya
Lahee ngoen baten beu abeh lumat
Bek le meukeumat ubena dosa

Aneuk tikoeh teng di-ek peusawat
Teukhem meu wat-wat aneuk murua
Ohno mumada haba lon surat
Sira peurasat bak Lido Graha.