Tanda Kiamat

Saleum horeumat keu bapak-bapak

Lheuh nyan keu cut kak sireuta guree

Adun ngoen Ado saban lon boeh hak

Jaro ulon grak lon anggoek ulee

Lon ci neuk kisah keu but yang reutak

Yang ka tapeujak hana le malee

Satu ngoen dua jino ulon grak

Keu lhee hai bapak lon buka teuntee

Bukon le sayang keutapang ramphak

Cicem ateuh bak dikeuprak bulee

Doenya ka akhe lonte meusipak

Ramee that cut kak hana le malee

Takheun yang dara remaja cangklak

Yang tuha hai pak pih saboh lagee

Peureuseh syetan bak jalan dijak

Meu ija sawak hana bak ulee

Disoek pakaian piasan nampak

Sang-sang cit tabak leumah meu adee

Yang titel nona sunggoeh that cabak

Gadoeh bak jak-jak sabe tip watee

Takheun yang inoeng si bungoeng meurak

Yang agam hai kak pih saboh lagee

Lam tip-tip uro lalo di bapak

Jak rabe cut kak diyub bak jambee

Yang model maboek preh gob joek sibak

Ganja geulantak ngoen sabee-sabee

Aneuk mit be-oek ka batoek dahak

Kaleupah lantak yang tan peureulee

Yang tan meukeusud dipubut galak

Yang bek tayu jak tuntut ileumee

Meunyoe but maksit keubit sep galak

But wajeb hai kak cit han meuteumee

Meutaroeh bola meujaga galak

Sigogo sipak limoeng ploeh ribee

Hana le meuri judi nyan hai pak

Cukoep that galak bak pubut seudee

Tanda kiamat umat dum rusak

Aneuk ngoen bapak jeut meu-en batee

Lako ngoen bino jino sadum krak

Meu-en keutuprak ngoen-ngoen meulintee

Peunyaket slingkuh juruh meu rhak-rhak

Jino sep guyak sabe tip watee

Nyoe brat ta pikee dige teuh hai kak

Meunyoe ta surak hana got lagee

Kakeuh sep oehno haba nyoe hai pak

Keu galak-galak pantoen ulon plee

Meunyoe na salah meu’ah hai cut kak
Yang peugot sajak hana pah ulee.