Pileh Pemimpin

Di langet manyang bintang meutabu

Cahaya jih hu jeureulah that-that

Seulama hudep kayem that ta eu

But ureung hayeu bak mita pangkat

Sabe lam gabuk hawa duk ukeu

Tip uro karu bak meukat ubat

Oeh golom jiduk gabuk hai teungku

Jak mita bangku suara rakyat

Watee ka jiduk bruk-bruk jitem hu

Geuratan tutue mandum jitem kap

Keu ureung gasin han peurlee tau

Dak na breuh catu jitem peu lambat

Pu lom kandidat reman sigeutu

Sabe meu hantu bak teken surat

Meunyoe lagee nyan boeh pajan maju

Sampe thoen ukeu sengsara rakyat

Makajih jinoe tanyoe bek karu

Ci peudong dikeu yang laen meuhat

Pileh pemimpin kalon yang hayeu

Beujeut peulaku ban yang ta harap

Beuna terbuka mangat bersatu

Mangat bek karu nanggro teuh nyan cap

Oleh sebab nyan lon tuan seru

Ta dukung laju yang hana kurap

Pemimpin carong layak dong dikeu

Ureung nyan mampu jeut keu aparat

Oeh ka teupileh dudo jeut ta eu

Pukeuh ek maju aceh meu daulat?

Meunyoe cit keubit Aceh han maju

Jeut lon jak dikeu gob nyan ta pagap

Mari beu kompak bapak dan ibu

Tanyoe bersatu peugot martabat

Bek that ta pateh rinteh gob hu-hu

Beurita palsu bukti tan mupat

Adak di pubroek na be-oek sapu

Ta anggap laju nyan atra lewat

Yang peunteng ampon nanggro beu maju

Bek le meu hantu ngoen ureung kaplat

Ngoen do'a-do'a aneuk hana ku

Yatim piatu fakir miskin that

Lakee bak Allah kheundak tuhanku

Kali nyoe ta-eu so pimpin rakyat

Ubena rakyat di Aceh maju

Suara geuhu beu sapu pakat

Buleun Pebruari nibak thoen ukeu

Pemimpin ta eu conteng lah siat

Yang hana meuri hai teungku-teungku

Uro nyan laju keudeh neu pagap

Beugot adek hai jai that yang palsu

Demi keu breuh bu dibalek ayat

Makajih Aceh han maju-maju

Seubab meu jampu teungku ngoen kaplat

Deungoen wassalam sekian dulu

Karangan lagu diteubit mupat

Teurimoeng gaseh meuceh lon tuju
Keu bapak ibu yang baca surat.