Jak Beut

Deungoen bismillah ulon mulai
Haba lon rawi si ala kada
Kuta ngoen dusoen gampong ngoen pasi
Ta eu meuriti dayah dum kana

Geupeugot dayah teumpat meungaji

Bek jeut keu pungli geutanyoe dumna
Hukoem agama mangat ta turi
Beutoei ngoen keuji ta tu’oeh beda

Beudoh bangsa lon muda ngoen mudi

Jinoe ta kaji ilmee agama
Inoeng ngoen agam hukoem beu meuri
Larang Ilahi bek roeh keurija

Ta tu’oeh hukoem pakek luweu li

Ta soek rok mini ta teupu dosa
Pakaian inoeng bek bak lelaki
Bek saban that hi ‘oeh ta eu rupa

Memang masa nyoe ka gura that hi

Meunuroet dali ka akhe masa
Ingat rakan lon muda ngoen mudi
Bek lupa diri geutanyoe dumna

Bek ta cok contoh di dalam tivi

Gaya meunari ngoen kutang beha
Rok jih ‘et teu-oet bajee you can see
Ingat hai Dek Ti bek roeh-roeh gata

Peutimang marwah ngoen harga diri

Yang keuji-keuji meubek ta hawa
Beudoh beu sare tajak meuriti
Malam ngoen hari kaji agama

Bak but yang hareum bek ta kerjai

Miseu meu judi ngoen ta pip ganja
Meunan cit arak tuak beurendi
Bek sampe judi merajalela

Pulom jameun nyoe ka canggih lagi

Le inovasi jenis narkoba
Nan sabu-sabu melambung tinggi
Le that pembeli tuha ngoen muda

Sigo ta tarek meu balek bumi

Meunan keuh arti taboeh umpama
Meunyoe ka keunoeng Allahu Rabbi
Kepingin lagi kheun awak Jawa

Mandum atra nyan kayem terjadi

Karna lam diri iman teuh hana
Hareum ngoen haleu hana taturi
Hana meungaji bidang agama

Mari geutanyoe Dek Gam ngoen Dek Ti

Jak beut meuriti geutanyoe dumna
Nak pah sembahyang deungoen ek haji
Nak sah meusuci seurta puasa

'Ehno mumada haba lon rawi
Kadang na teusi meu’ah lon pinta
Kadang teusinggoeng meucureh hati
Allah ya Rabbi neu ampon dosa.