Paleh

Aceh jameun nyoe cukoep that peudeh

Meunyum that seudeh di dalam hati

Aneuk manusia le that ka paleh

Le that meulanggeh yang larang Rabbi

Bak surat kabar haba that meuceh

Sinan meutuleh sabe tip hari

Watee ta baca bareh keu bareh

Sang-sang peureuseh nanggro Itali

Padahai tanyoe kon nanggro Inggreh

Kon nanggro Pranceh atau Australi

Meunyoe awak nyan cit kadeuh paleh

Cit kadeuh gareh nanggro yahudi

Nanggro geutanyoe nanggro that meuceh

Nanggro geuwareh hukoem Islami

Pakon keuh jino tanyoe ka paleh

Lam lungkik binteh meu kap-kap bibi

'Oeh malam teuka meu kruk-kruk abeh

Ditem duk-duk eh muda ngoen mudi

Deungoen pasangan mesra beureuteh

Bahgia abeh 'oeh ta peurati

Di ateuh honda peu sapat beuteh

Peu saban gateh lage lam tivi

Ladoem nyak dara peu sadeu kueh

Keunan di peu eh bak rung si laki

'Oeh ta eu barang mantong be pureh

Meunyoe keu paleh Allahu Rabbi

Di soek siluweu yang sarat abeh

Lejing dituleh nama geurasi

Dipakek bajee yang deuh atra jeh

Peuhah si gareh supaya seksi

Lam reumang lampu sinan meu abeh

Peu taba kueh keu sigam basi

Teuma yang ladoem jiduk meu lapeh

Meu tindeh-tindeh muda ngoen mudi

Yang duk di teungoeh si adek puteh

Yang jeut keu binteh dua lelaki

Rot keu ngoen likoet disedot abeh

Jaro bineh keh meu ula-ili

Di sinyak dara galak jih abeh

Ka lagoet kueh keu abang basi

Keu leubeh jelas wahe e wareh

Taci jak sapeh 'oeh malam hari

'Oeh malam minggu ta ci meu abeh

Takalon beu beh pu yang terjadi

Sebab haba nyoe kon tuleh-tuleh

Kon haba rinteh leumah lam mimpi

Kadang cit ragu hanjeut neu pateh

Silakan wareh neujak teliti.